İqtisadiyyat.az xəbər verir ki, bu, Nazirlər Kabinetinin 2024-cü ildə fəaliyyəti haqqında hesabatında öz əksini tapıb.

2024-cü ildə bank sektorunun maliyyə vasitəçiliyinin genişləndirilməsi və real sektorun maliyyə resurslarına əlçatanlığının artırılması istiqamətində tədbirlər davam etdirilib.

Hesabat dövründə kredit qoyuluşlarında aktivlik müşahidə olunub, bankların aktivlərinin 51,8%-ni kredit portfeli təşkil edib, biznes portfeli 17,2% artıb, Sahibkarlığın İnkişafı Fondu tərəfindən verilən güzəştli kreditlərin 72%-i regionların payına düşüb.

2024-cü il ərzində bank sektorunun cəmi öhdəlikləri 7,6% (3,3 mlrd. manat) artaraq 46.4 mlrd. manat olub. Depozitlər cəmi öhdəliklərin 81%-i həcmində olub ki, bunun da 38%-ni əhalinin əmanətləri təşkil edib. Hesabat ili ərzində əhalinin banklarda olan əmanətləri 13,6% (1,7 mlrd. manat) artaraq 14,3 mlrd. manat (sahibkar fiziki şəxslərin hesabları çıxılmaqla) təşkil edib. 2023-cü ilin sonu ilə müqayisədə əmanətlərin valyuta strukturu əsasən sabit qalmış və əmanətlərin 66%-i və ya 9,4 mlrd. manatı milli valyutada, 34%-i və ya 2,9 mlrd. ABŞ dolları isə xarici valyutada olub. Əmanətlərin 86%-i Əmanətlərin Sığortalanması Fondu tərəfindən qorunan, 57%-i isə kompensasiya olunan əmanət statusundadır.