Azərbaycanda şirniyyat istehsalı və satışı ilə məşğul olan məşhur "Mamam Chocolate and Bakery" MMC məhkəməlik olub.

İqtisadiyyat.az xəbər verir ki, şirkətin işdən çıxarılan əməkdaşı Həsənova Ətrabə Yaşa qızı məhkəmədə iddia qaldırıb.

O, müraciətində işdən haqsız yerə çıxarıldığını bildirib. Keçmiş əməkdaşı işə bərpa olunması və işdən çıxarıldığı müddət üçün əmək haqqı tələbi irəli sürüb.

Ə.Həsənovanın iddiası Bakı Apellyasiya Məhkəməsində hakim Fuad Babayevin sədrliyi ilə araşdırılacaq.

Qeyd edək ki, "Mamam Chocolate and Bakery" MMC 2018-ci ildə dövlət qeydiyyatına alınıb. Şirkətin nizamnamə kapitalı 13 824 794.50 manatdır. Şirkətin Bakıda böyük istehsalat müəssisəsi mövcuddur. "Mamam Chocolate and Bakery" müxtəlif növ şokolad və şirniyyat məhsulları ("Choco Art" adlı şokolad, "Choco Time" adlı konfet, "Zoluska" və "Wafi" adlı vaflilər, "Sun Choco" adlı şokolad qlazuru, "Shokki Mokki" , "Cey-Cey", "Choco Bieno", "Vega", "Chocolake", "Schocolatte", "Sun Pralin" adlı şokolad kremləri) istehsal edir.