Ermənistan və Azərbaycanın xarici işlər nazirləri arasında keçiriləcək danışıqların növbəti raundu təxirə salınıb. 

İqtisadiyyat.az xəbər verir ki, bu barədə Ermənistan Xarici İşlər Nazirliyinin mətbuat xidməti məlumat yayıb.

“Azərbaycan tərəfinin xahişi ilə Vaşinqtonda planlaşdırılan müzakirələrin növbəti raundu təxirə salınır. İclasın yeni tarixi barədə ictimaiyyətə lazımi qaydada məlumat veriləcək".

Daha əvvəl Azərbaycan və Ermənistan xarici işlər nazirləri arasında danışıqların növbəti raundunun iyunun 12-də baş tutacağı bildirilirdi.

Vaşinqtonda nazirlərin danışıqları 4 gün (1-4 may) davam edib. Onlar ABŞ dövlət katibi Entoni Blinkenlə iki dəfə görüşüblər. Danışıqlardan sonra ABŞ dövlət katibi Ermənistan və Azərbaycanın sülh sazişinin imzalanması istiqamətində mühüm irəliləyiş əldə etdiyini bildirib.