Bu gün Bakıda dünyanın aparıcı su mütəxəssisləri və ekoloqlarının iştirakı ilə ikinci Xəzər Su İnnovasiya Forumu davam edir.
İqtisadiyyat.az-ın məlumatına görə, forumun birinci panelindən danışan ETSN-nin Su ehtiyatlarının idarə edilməsi şöbəsinin sektor müdiri Faiq Mütəllimov bildirib ki, hazırda su ehtiyatları, su ehtiyatlarına çıxış daha çox sosial məsələyə çevrilib. Lakin, onun ekoloji və iqtisadi dəyərləri də var:
“Suyun iqtisadiyyata, ümümdaxili məhsula töhfəsi bəllidir. Keçmişdə qalan anlayış indi pilləli şəkildə aradan qalxır. Başqa ölkələrlə müqayisə etdikdə su ehtiyatları Azərbaycanda az olan ölkə kimi dəyərləndirilir. Həmçinin, bizim yerüstü su ehtiyatlarımızın daha çox xarici ölkələrdə formalaşır və bu da bir növ əlavə risk yaradır.
Qiymətləndirilmələr uzun illər əvvəl aparılıb və 39 milyard kubmetr kimi dəyərləndirilib. Bizim əsasən su istifadə etdiyimiz sektor kənd təssərrüfatı və suvarma sektorudur. Burada su ehtiyatlarımızdan 90 faizə yaxını, məişət və içməli su üçün də 1 milyard kubmetr qədərində su istifadə olunur. Sənaye və digər sahələri də nəzərə alırıq. Ümumilikdə bu rəqəm 9 milyarddan bir qədər artıqdır. Ən pis halda isə il ərzində 40-50 faizə qədər su itkisi ilə qarşılaşırıq. Təəssüf ki, ölkədə sudan səmərəli istifadə olunmur. Bu səbəblə də Azərbaycan su stressi yaşayan ölkələr sırasındadır."
Xatırladaq ki, “Aqualink” şirkətinin təşkilatçılığı, Azərbaycan Respublikasının Ekologiya və Təbii Sərvətlər Nazirliyinin təşkilati dəstəyi ilə keçirilən forumda dünyanın 15 ölkəsindən 26 aparıcı şirkət, o cümlədən 60 dan beynəlxalq səviyyəli peşəkar mütəxəssislər qatılıb.
Forumun media tərəfdaşlarından biri də İqtisadiyyat.az saytıdır.
