“Azərbaycan Sənaye Korporasiyası” ASC-yə (ASK) məxsus "Azərizolit" MMC məhkəməyə verilib.

İqtisadiyyat.az xəbər verir ki, bununla bağlı ASK özü məhkəmədə iddia qaldırıb.

İşin mahiyyəti müqavilələrdən əmələ gələn öhdəliklər üzrə mübahisələrlə (icarə müqaviləsi üzrə mübahisələr) bağlıdır.

ASK-nın özünə məxsus olan şirkətə qarşı iddiası Şəki Kommersiya Məhkəməsində hakim Rüfət Məcidovun sədrliyi ilə araşdırılacaq. 

Qeyd edək ki, bu ilin yanvarında "Azərizolit"in direktoru Yeganə Nuruyeva vəzifəsindən azad edilib. Şirkətə rəhbərlik Şaiq İsmayılova həvalə olunub.

Xatırladaq ki, "Azərizolit" 2018-ci ildə Mingəçevir şəhərində yerləşən “Azərelektroizolit” zavodunun bazasında yaradılıb. Nizamnamə kapitalı hazırda 9 828 300 manat olan "Azərizolit"in əvvəlki adı “ASK İzolit” olub. Sənaye müəssisəsi elektroizolyasiya materialları istehsal edir.