“Azərbaycan Sənaye Bankı” Mərkəzi Bankın likvidlik riski ilə bağlı tələblərini pozub. 

İqtisadiyyat.az bu barədə Azərbaycan Mərkəzi Bankına istinadən xəbər verir. 
Belə ki, “Azərbaycan Sənaye Bankı”  məcmu halda likvidliyin örtülmə əmsalının düzgün hesablanmaması nəticəsində 2024-cü ilin fevral ayının sonuna Mərkəzi Banka təqdim edilən hesabatda Mərkəzi Bankın “Banklarda likvidlik riskinin idarə edilməsi Qaydası”nın 7.2-ci bəndi ilə müəyyən edilmiş həddən yuxarı saxlanması tələbini təmin etməyib. 

Mərkəzi Bank “Banklar haqqında” Qanunun 47-ci maddəsinin tələblərini rəhbər tutaraq “Azərbaycan Sənaye Bankı” ASC-yə bu sahədə daxili nəzarət sistemlərinin təkmilləşdirilməsi ilə bağlı icrası məcburi sərəncam verilib. AMB qeyd edib ki, sözügedən pozuntu bankın maliyyə dayanıqlığı üçün təhdid yaratmır. 

Qeyd edək ki, sözügedən Qaydaya əsasən 2023-cü ilin 01 dekabr tarixinə likvidliyin örtülmə əmsalı məcmu halda və xarici valyutada ayrılıqda 100 faiz və ya bundan yuxarı olan banklar həmin əmsalların 100 faizdən aşağı həddə düşməməsini təmin etməlidir.