Azərbaycan Premyer Liqasında 19-cu tura yekun vurulub.
İqtisadiyyat.az xəbər verir ki, turun ilk matçı Gəncədə keçirilib. Elçin Məsiyevin idarə etdiyi oyunda "Kəpəz" "Qəbələ" klubu ilə 2-2 hesablı bərabərliyə razılaşıb. 4 qolun qeydə alındığı bu matçda hakim əlini sarı vərəqə üçün 4 dəfə cibinə atıb.
Turun ən bol qollu matçı Tovuz şəhər stadionunda baş tutub. "Qarabağ"ın 2-3 hesabı ilə məğlub etdiyi "Turan Tovuz" matçında hakim Fərid Hacıyev futbolçulara 5 sarı vərəqə göstərib.
"Zirə"nin "Sumqayıt"ı qəbul etdiyi matç da dramatikliyi ilə yadda qalıb. İlk hissəsində məğlub olduğu matçı Zirə təmsilçisi 3-1 hesabıyla qazanmağı bacarıb. Kamranbey Rəhimovun idarə etdiyi matçda 3 sarı vərəqə qeydə alınıb.
Bu turda geridönüş etməyi bacaran komandalardan biri də "Şamaxı"dır. Şamaxı şəhər stadionunda "Səbail"i qəbul edən komanda fasiləyə 0-1 hesabı ilə məğlub yollanıb. İkinci hissə 2 qol vuran Şamaxı təmsilçisi qələbəyə sevinib. Baş hakim Cavid Cəlilov 2 dəfə sarı vərəqədən istifadə edərək oyunu tamamlayıb.
Turun son matçı isə "Bank Respublika Arena"da baş tutub. FİFA referisi Əliyar Ağayevin baş hakimi olduğu matçda sevinən tərəf "Sabah" klubu olub. "Neftçi"ni qəbul edən Masazır təmsilçisi 2-0 hesabı ilə qalib gəlib. Matçın protokoluna cəmi 2 sarı vərəqə yazılıb.
Ümumilikdə 5 matçda 18 qol vurulub. Fərqlənə bilməyən yeganə komanda "Neftçi"dir. Qırmızı vərəqənin göstərilmədiyi bu turda cəmi 16 sarı vərəqə qeydə alınıb.
Qeyd edək ki, Azərbaycan Premyer Liqasının 20-ci turu yanvarın 30-da start götürəcək.
