Bu gün Pakistanın Baş naziri Şahbaz Şərif Azərbaycana gələcək.

İqtisadiyyat.az xarici mediaya istinadən bildirir ki, səfər çərçivəsində Pakistanın Baş naziri ticarət, investisiya və enerji sahələri daxil olmaqla, Azərbaycanla əməkdaşlığın əsas istiqamətlərini müzakirə edəcək. Eyni zamanda çoxtərəfli forumlarda qarşılıqlı maraq doğuran regional və qlobal məsələlər müzakirə olunacaq.

 İslamabadda keçirilən  mətbuat konfransında çıxış edən Pakistanın neft naziri Musadik Malik bildirib ki, Azərbaycan Pakistana daha sərfəli qiymətə aylıq LNG yükü verməyə razılaşıb. Təchizat müqaviləsinin konkret təfərrüatları açıqlanmasa da,  tədarüklərin yaxın vaxtlarda başlayacağı təsdiqlənib.

Nazir əlavə edib ki, rəhbərlik səviyyəsində keçirilən görüşlər iki ölkə arasında dostluq bağlarını möhkəmləndirir. Bu,  Pakistan və Azərbaycan xalqlarının qarşılıqlı rifahı naminə daha sıx çoxşaxəli əməkdaşlığa töhfə verir.

Qeyd edək ki, ötən il Rusiyanın Ukraynaya təcavüzü nəticəsində qlobal qiymətlərin yüksəlməsindən sonra  enerji istehsalı üçün qazdan asılı olan və idxalı ödəmək üçün valyuta çatışmazlığı hiss edən Pakistan spot mayeləşdirilmiş təbii qaz (LNG) əldə etməkdə çətinlik çəkib. Bu isə ölkədə enerji qıtlığının yaranmasına yol açıb. Bununla yanaşı, Asiya spot LNG qiymətləri bu il nəzərəçarpacaq dərəcədə azalıb və avqustda qeydə alınan 70 dollar rekord hədd 10 dollardan aşağı düşüb.