İqtisadiyyat.az xəbər verir ki, bu barədə Assosiasiyanın sədri Orxan Bağırov bildirib.

Onun sözlərinə görə, təşkilat fəaliyyətini Azərbaycan Kapital Bazarları Assosiasiyası adı ilə davam etdirəcək: "Azərbaycan Kapital Bazarları Assosiasiyası (qısa adı ilə AKBA) ölkənin kapital bazarlarının inkişafına töhvə vermək üçün yenilənmiş konseptlə fəaliyyətinə davam edir. Yeni konseptin əsas məqsədi kapital bazarlarını hamı üçün anlaşılan, əlçatan və cəlbedici etməkdir. Qısa və orta müddətli dövrdə assosiasiya üzvlük və etik qaydalarını yenidən tənzimləməklə, üzvlük haqqı sistemini təkmilləşdirmək və üzvlərin aktivliyini artırmaq üçün müxtəlif reytinqlər tətbiq etməklə daxili idarəetmə mexanizmlərini möhkəmləndirəcəkdir".

O.Bağırov söyləyib ki, Assosiasiya yeni dövrdə xüsusi ilə kommunikasiya fəaliyyətini gücləndirəcək, ölkə daxilində və beynəlxalq səviyyədə nüfuzunu artırmağı, dövlət orqanları ilə münasibətlərini təkmilləşdirməyi hədəfləyir. AKBA o cümlədən bir-bir təqdimatlar və "roadshow"lar vasitəsilə üzvlərin sayını artırmağı planlayır:

"AKBA hüquqi məsələlər üzrə ekspert mərkəzi quraraq mübahisələrin həllində peşəkar vasitəçilik etməyi, o cümlədən kapital bazarlarında iştirak etmək istəyən hüquqi şəxslər üçün məsləhət xidmətləri verməyi planlaşdırır. Assosiasiyamız yeni dövrdə analitika və tədqiqat fəaliyyətini genişləndirərək bazar araşdırmaları aparacaq, ekspert qruplarını gücləndirəcək və innovativ texnoloji həllər tətbiq etməklə üzvlərinə effektiv xidmət verəcəkdir. Yeni AKBA konsepti şəffaflıq, davamlı inkişaf və maarifləndirmə üzərində qurulmuşdur və bütün tərəfdaşlarla birlikdə Azərbaycanın kapital bazarlarını daha güclü və rəqabətədavamlı etməyi hədəfləyir".

İsmayıl Bakuvi