“Bu gün Azərbaycanın enerji potensialı çox böyükdür. Azərbaycanın təsdiq olunmuş qaz ehtiyatları 10 il əvvəl 2,6 trilyon olduğu halda, bu gün reallıqda bundan daha çox böyük rəqəmlərlə ifadə olunur. O cümlədən, neft ehtiyatımız yataqlarımızın yenidən qiymətləndirilməsi ilə 500 milyon tondan 1 milyard tona çatdığı müəyyən olunub”.

Bu sözləri İqtisadiyyat.az-a açıqlamasında Milli Məclisin deputatı Azər Badamov bildirib.

O qeyd edib ki, işğaldan azad olunmuş ərazilərimizdə tikilən kiçik su elektrik stansiyalarında istehsal olunan elektrik enerji gücü 300 meqavata çatıb: “Yaxın gələcəkdə bu rəqəm 500 meqavata çatacaqdır. Ölkəmiz təsdiq olunmuş 200 qiqavat günəş və külək enerji potensialına malikdir. Bərpa olunan enerji potensialımızın istehsalı üçün tikilən stansiyalar dövlət vəsaiti sərf olunmadan ancaq xarci investisiyalar hesabına ərsəyə gəlir”.

“2030-cu ildə ölkəmizdə istehsal olunacaq bərpaolunan enerjinin həcmi 6 qiqavata çatacaqdır. O cümlədən Azərbaycan Qara dənizin dibi ilə tikiləcək kabel vasitəsilə 4 qiqavat yaşıl elektrik enerjisini Avropaya ixrac edəcəkdir. Yəni, Azərbaycan əlavə investisiya qoymadan məhz xarici investisiyalar hesabına bərpa olunan enerji istehsal edəcəkdir. Təbii ki, bu həm daxili təlabatımızı ödəməyimizə, həm də ixrac etməyimizə imkan verəcək”, - deputat söyləyib.