"İraqın Azərbaycan sərmayəsinə üstünlük verməsi bizim də maraqlarımıza xidmət edə bilər".

Bunu İqtisadiyyat.az-a açıqlamasında iqtisadçı ekspert Xalid Kərimli deyib. 

O, Azərbaycanın İraqa neft-qaz sahəsində investisiyalar yatırmaqda maraqlı olduğunu bildirib.

Əvvəllər İraqla əməkdaşlığın, demək olar ki, yox səviyyəsində olduğunu xatırladan ekspert söyləyib ki, artıq bu ölkədən Azərbaycana gələn turistlərin sayında artım müşahidə olunur:

"Ümumiyyətlə, İraq turistlərinin Azərbaycana gəlməsi üçün şərtlərin yaxşılaşdırılması ölkəmizin maraqları çərçivəsindədir. Ötən günlərdə İraq aviaşirkətinin Bakıya uçuşlar həyata keçirəcəyi barədə xəbərlər yayılıb. Azərbaycandan da bu ölkəyə dini turizm marağında olan şəxslər çoxluq təşkil edir. İki ölkə arasında birbaşa uçuşların həyata keçirilməsi onların da rahatlığını təmin edəcək. 
İraqın Azərbaycan sərmayəsinə maraqlı olması məsələsinə gəldikdə isə hesab edirəm ki, bu bizim də maraqlarımıza xidmət edə bilər. İraqın neft-qaz sənayesində SOCAR-ın profilinə uyğunluğunu nəzərə alsaq strateji baxımdan yüksək səviyyədə razılıqlar olarsa, Azərbaycan bu ölkəyə neft-qaz sahəsində investisiyalar yatıra bilər".

Qeyd edək ki, Əbdüllətif Camal Rəşid noyabrın 19-da Azərbaycana Respublikasına rəsmi səfərə gəlib.

Sadiq Cavadov