"Qarabağa köç edən vətəndaşlar peşə təhsili alacaq".

İqtisadiyyat.az xəbər verir ki, bu sözləri İnsan Resursları Zirvəsinin açılış mərasimində peşəkar kadrların işağldan azad olunmuş ərazilərə axınının təmin olunmasına toxunan çıxış edən əmək və əhalinin sosial müdafiəsi naziri Sahil Babayev deyib.

O qeyd edib ki, sözügedən istiqamət üzrə silsilə işlər həyata keçirilir və bu proses davam etdiriləcək:

"İşğaldan azad olunmuş ərazilərdə işçinin əməyinin ödənişinə dair qanunverici paket qəbul etmişik. Bu paketdə özəl sektorun fəaliyyəti üçün böyük güzəştlər təsbit olunub. Bundan başqa, dövlət tərəfindən həyata keçiriləcək layihələrə dair güzəştlərin tətbiq olunması nəzərdə tutulub. Bu, yaratdığımız stimullaşdırma paketidir. 

Digər istiqamət köç edən məcburi köçkünlərimizin qiymətləndirilməsidir. Bildiyiniz kimi, "Böyük Qayıdış" çərçivəsində 2026-cı ilin sonunadək 140 minə yaxın vətəndaşın köçü planlaşdırılır. Azad olunmuş əraziyə köçəcək əmək qabiliyyətində olan hər bir insanın qiymətləndirilməsi ilə bağlı təhlil aparılır. İkinci mərhələdə isə köç edən vətəndaşların ixtisas biliyi və bacarığı olan insanlara peşə təhsili və peşə hazırlığı çərçivəsində təlim proqramı keçiriləcək.

Növbəti dövrdə isə sözügedən ərazilərdə yaradılacaq rəqabət mühiti peşəkarların axına imkan yaradacaq".