Azərbaycan Dövlət Su Ehtiyatları Agentliyinin tabeliyindəki Tikilməkdə Olan Obyektlərin Müdiriyyəti Laçın və Ağdamın bəzi kəndlərinin xarici su təchizatı və kanalizasiya sisteminin yaradılması işlərinin satın alınması ilə bağlı elan etdiyi tenderi yekunlaşdırıb.
İqtisadiyyat.az xəbər verir ki, Laçın rayonunun Zabux, Sus, Bəylik və Güləbird kəndlərinin xarici su təchizatı və kanalizasiya sisteminin yaradılması işlərini "Az Graft Construction" şirkəti həyata keçirəcək.
Tikilməkdə Olan Obyektlərin Müdiriyyəti ilə şirkət arasında qeyd olunan işlərin reallaşdırılması ilə bağlı dəyəri 7,1 milyon manat olan müqavilə bağlanılıb.
Qurum Ağdam rayonunun Sarıcalı kəndinin xarici su təchizatı və kanalizasiya sisteminin yaradılması işlərini isə "Rəmzi" MMC-yə həvalə edib və onunla 1,6 milyon manat dəyərində müqavilə bağlayıb.
Ağdamın Kəngərli və Xıdırlı kəndlərinin xarici su təchizatı və kanalizasiya sisteminin yaradılması işlərini isə "RR İnvestment" MMC 6,1 milyon manata icra edəcək. Qurumla şirkət arasında artıq müqavilə də bağlanılıb.
