İqtisadiyyat.az xarici mediaya istinadla xəbər verir ki, Beynəlxalq enerji mərkəzi "Ember"in analizinə görə, bölgədə temperaturun kəskin yüksəlməsi ilə elektrik enerjisinə olan tələbat əhəmiyyətli dərəcədə artıb, bu isə qiymətlərin də sürətlə bahalaşmasına səbəb olub.

İspaniyada iyunun 28-dən iyulun 1-dək olan dövrdə, havanın 40 dərəcəni keçməsi ilə gündəlik elektrik tələbatı əvvəlki həftəyə nisbətən 14 faiz artıb. Eyni dövrdə Fransada 9, Almaniyada isə 6 faiz artım qeydə alınıb.

Bu artım fonunda istilər termik və nüvə stansiyalarında ciddi problemlərə səbəb olub. Fransada çay sularının həddən artıq isinməsi nəticəsində 18 nüvə stansiyasından 17-si istehsalı məhdudlaşdırıb, bəziləri isə müvəqqəti bağlanıb.

Bu vəziyyət enerji təklifi ilə tələbat arasında tarazlığın pozulmasına səbəb olub. 24 iyun–1 iyul tarixləri arasında Almaniyada elektrik qiymətləri 175 faiz, Fransada 108 faiz, Polşada 106 faiz, İspaniyada isə 15 faiz artıb. 1 iyul axşam saatlarında Polşada elektrik qiyməti hər megavatsaat üçün 470 avroya, Almaniyada isə 400 avroya çatıb.

Bununla belə, Avropa İttifaqı üçün iyun ayı günəş enerjisi istehsalında rekordla yadda qalıb. AB üzrə günəşdən elektrik istehsalı illik müqayisədə 22 faiz artaraq tarixdə ən yüksək səviyyəyə çatıb. Ember təşkilatının Avropa proqramı direktoru Pavel Çıjak bildirib ki, gün ərzində günəş enerjisinin yüksək istehsalı elektrik şəbəkəsini dəstəkləyib və kəsintilərin qarşısını alıb.

Lakin axşam saatlarında enerji toplama sistemlərinin yetərsizliyi səbəbindən qiymətlər kəskin bahalaşıb. Çıjak qeyd edib ki, artıq isti hava dalğaları daimi hal alıb və buna qarşı mübarizə üçün enerji bazarında yeni planlama metodlarına, batareya sistemlərinə, çevik tarif modellərinə və inteqrasiya olunmuş enerji şəbəkələrinə ehtiyac var.