Dünya Bankı bu il Avropa və Mərkəzi Asiya iqtisadiyyatının artım tempinin 2,8% olacağını gözləyir.

İqtisadiyyat.az xəbər verir ki, bu barədə Dünya Bankının Avropa və Mərkəzi Asiya iqtisadiyyatlarına dair “Özəl sektorun gücünün açılması” adlı aprel hesabatında deyilir.

Hesabatda qlobal iqtisadiyyatın zəifləməsi, sərt pul-kredit siyasəti, Çində iqtisadi yavaşlama və aşağı əmtəə qiymətlərinin regionun inkişaf perspektivinə təzyiq göstərdiyi bildirilib. Bu səbəbdən bu il Avropa və Mərkəzi Asiya regionunun iqtisadiyyatında yavaşlama gözlənilir.

Hesabatda Rusiya ilə müharibədən zərər çəkmiş Ukrayna iqtisadiyyatının yenidən böyüməsi və Mərkəzi Asiyada güclü dirçəliş nəticəsində ötən il Avropa və Mərkəzi Asiya iqtisadiyyatlarının 3,3% artdığı vurğulanıb.

Məlumata görə, Avropa və Mərkəzi Asiya iqtisadiyyatının gələn il 2,7% artacağı təxmin edilir.

 

Gözəl Həşimova