Bu yay Avropanın cənubunda baş verən quraqlıq və meşə yanğınları regionda su qıtlığı ilə bağlı vəziyyəti xeyli pisləşdirib.

Bu barədə İqtisadiyyat.az "Financial Times"a istinadən xəbər verir.

Məlumata görə, problem anomal isti hava şəraiti və yerli hakimiyyət orqanlarının zəif siyasəti ilə daha da dərinləşir. Bildirilib ki, Avropa İttifaqında quraqlıq 1976-2006-cı illər arasında təxminən 20% artıb. Eyni zamanda, Dünya Resursları İnstitutu (WRI) proqnozlaşdırır ki, 2030-cu ilə qədər qlobal şirin suya tələbat mövcud təklifi 56% üstələyəcək.

Su qıtlığı daha çox Avropa fermerlərinə ziyan vura bilər. Hazırda ən çox Belçikada içməli su problemi yaşanır. Bu da ölkədə əhalinin sıxlığı və zəif infrastrukturla bağlıdır. Bundan əlavə, bir sıra Avropa ölkələrində köhnə boru kəmərləri səbəbindən əhəmiyyətli miqdarda su itkisi baş verir. Vəziyyət kommunal şirkətlərin infrastruktura sərmayə qoymaması ilə daha da ağırlaşır.

 

Gözəl Həşimova