Avropa İttifaqının (Aİ) 27 üzv dövləti dünən Avropa Parlamentinə (AP) 720 deputat seçib.

İqtisadiyyat.az dünya mediasına istinadən xəbər verir ki, Aİ ölkəsinin əhalisi nə qədər çox olarsa, onun daha çox Parlament üzvü olur.

Nəticədə 96 deputatla Parlamentdə Almaniya liderlik edib. Ən kiçik ölkələr olan Malta və Lüksemburq kimi ölkələrə ən azı 6 AP üzvü zəmanət verilir.

Bəs Avropa Parlamentində deputatlar nə qədər maaş alırlar?

Avropa Parlamentində deputatların sosial sığorta haqları və vergiləri çıxıldıqdan sonra əməkhaqqları 7 min 853 avro təşkil edir. Bu pul Parlamentin büdcəsindən ödənilir və maaşlar milliyyətindən asılı olmayaraq bütün 720 deputat üçün eynidir.

Bununla belə, hər bir ölkə əlavə milli vergilər tətbiq etməkdə sərbəstdir.  Avropa Parlamentində fəaliyyət göstərən siyasətçilər əsas maaşlarından əlavə, peşə xərclərini (telefon, internet, ofis idarəçiliyi və s.) qarşılamaq üçün aylıq 4950 avro müavinət alırlar.

Bundan əlavə, Avropa Parlamentinin iclaslarının keçirildiyi Brüsseldə və ya Strasburqda (yemək, otel və s.) olmaq üçün deputatlara xərclərini ödəmək məqsədilə gündə 338 avro sabit müavinət verilir.

Gözəl Həşimova