Avrozonada dövlət borcunun ümumi daxili məhsula (ÜDM) nisbəti bu ilin ikinci rübündə 88,1 faizə yüksəlib.

İqtisadiyyat.az xəbər verir ki, bu barədə Avropa Statistika İdarəsi (Eurostat) bu ilin ikinci rübü üçün məlumatlarını açıqlayıb.

Məlumata görə, Avrozonada birinci rübdə 87,8 faiz olan dövlət borcunun ÜDM-ə nisbəti ikinci rübdə 88,1 faizə yüksəlib.

Avropa İttifaqında birinci rübdə 81,3 faiz olan dövlət borcunun ÜDM-ə nisbəti ikinci rübdə 81,5 faizə çatıb. Beləliklə, ümumi dövlət borcu Avrozonada 13 trilyon 95 milyard avroya, Aİ-də isə 14 trilyon 300 milyard avroya yüksəlib.

Aİ-yə üzv ölkələr arasında dövlət borcunun ÜDM-ə nisbəti ən yüksək olan ölkə 163,6% ilə Yunanıstan olub. Yunanıstanı 137 faizlə İtaliya, 112,2 faizlə Fransa, 108 faiz ilə Belçika, 105,3 faizlə İspaniya və 100,6 faizlə Portuqaliya izləyib.

Sözügedən dövrdə dövlət borcunun ÜDM-ə nisbəti ən aşağı olan ölkələr 22,1% ilə Bolqarıstan, 23,8% ilə Estoniya və 26,8% ilə Lüksemburq olub.

 

Gözəl Həşimova