Avropa İttifaqına (Aİ) üzv olan 20 ölkənin vahid valyutası olan avronun qlobal ehtiyatlardakı payı ötən il 1 bənd azalıb.

İqtisadiyyat.az xəbər verir ki, bu barədə Avropa Mərkəzi Bankının (AMB) hesabatında deyilir.

Məlumata görə, 2022-ci ilin sonunda 21% olan avronun beynəlxalq ehtiyatlardakı payı ötən ilin sonunda 20%-ə enib. Sözügedən dövrdə avronun payı 1 bənd azaldığı halda, onun beynəlxalq ehtiyatlardakı payı 2020-ci ildəki səviyyəsinə enib.

Ötən il avronun depozit və kreditlərdə də payı azalıb. Avro ilə beynəlxalq əməliyyatların hesab-fakturaları isə 51,7%-dən 51,9%-ə yüksəlib.

Bunun əksinə olaraq, ABŞ dolları, Yapon yeni və digər qeyri-ənənəvi ehtiyat valyutaların payları artıb. Yenin payı 0,6 bənd artaraq 5,7 %-ə yüksələrkən, yuanın payı 0,2 bənd azalıb.

Bankın məlumatına görə, 2022-ci ildə aktivləri dondurulmazdan əvvəl Rusiya Mərkəzi Bankı qlobal ehtiyatların təxminən 8 faizini avro ilə saxlayıb. Bu vəziyyət isə onu göstərir ki, sanksiyalarla bağlı tədbirlər gələcəkdə avronun qlobal valyuta ehtiyatlarında payı ilə bağlı ola bilər.

Qlobal ehtiyatlarda avronun payı azalsa da, dollar 58,4%-lik payla dünyanın ən çox üstünlük verilən ehtiyat valyutası mövqeyini qoruyub saxlayır. Ötən il qlobal ehtiyatlarda dolların payı 0,3% artıb.

Gözəl Həşimova