Azərbaycan Premyer Liqasında 2022/2023 mövsümünün başa çatmasına 1 tur qalıb.
İqtisadiyyat.az xəbər verir ki, vaxtından əvvəl çempion olan "Qarabağ" Çempionlar Liqasının 1-ci tənsifat mərhələsində mübarizə aparacaq.
Premyer Liqada 2-ci yeri təmin edən "Sabah" klubu Avropa Konfrans Liqasının 2-ci təsnifat mərhələsindən mübarizəyə başlayacaq.
"Neftçi" klubu Premyer Liqada "Sabah" klubunun gerisində qərarlaşıb və Avropa Konfrans Liqasının 2-ci təsnifat mərhələsini təmin edib.
Premyer Liqanin 4-cü yeri uğrunda mübarizə son tura kimi davam edəcək. Belə ki, hal-hazırda 49 xal toplayan "Qəbələ" klubu turnir cədvəlinin 4-cü pilləsində, ondan 2 xal az toplayan "Zirə" klubu isə 5-ci pillədə qərarlaşıb. Son turda "Qəbələ" klubunun məğlub olub, "Zirə" klubunun qalib gələrsə klublar turnir cədvəlində yerlərini dəyişəcək. "Qəbələ" klubunun heç-heçə edib, "Zirə" klubunun qalib gəlməsi halında isə hər iki klubun xalları bərabərləşəcək. Belə olan halda iki komandanın bu mövsüm aralarında baş tutan qarşılaşmalara baxılacaq. Qeyd edək ki, bu qarşılaşmalarda "Qəbələ" klubu üstün vəziyyətdədir. Bir sözlə "Zirə" klubu son turda qələbə qazansa da, "Qəbələ" klubunun məğlub olmasını gözləyəcək.
Premyer Liqada sonuncu yeri tutacaq komandanın adına da son turda aydınlıq gələcək. Hal-hazırda 25 xalla 10-cu pillədə qərarlaşan "Şamaxı" klubu sonuncu turda 26 xalla 9-cu pillədə olan "Səbail" klubunun qonağı olacaq. Şamaxı şəhər təmsilçisini qələbədən başqa heç bir nəticə qane etmir. "Səbail" klubu bu görüşdə məğlub olmasa Premyer Liqada qalmağı təmin etmiş olacaq.
Qeyd edək ki, 36-cı turun oyunları mayın 28-də keçiriləcək.
