İyunun 14-dən iyulun 14-dək Almaniyanın 10 şəhərində keçiriləcək çempionat 50 gün sonra Münhendəki “Allianz Arena”da Almaniya və Şotlandiya milliləri arasında keçiriləcək açılış matçı ilə başlayacaq.

İqtisadiyyat.az xəbər verir ki, AVRO-2024-ə Almaniyanın Berlin, Köln, Münhen, Frankfurt, Hamburq, Dortmund, Leypsiq, Gelzenkirxen, Ştutqart və Düsseldorf şəhərləri ev sahibliyi edəcək.

Turnirin qrup oyunları iyunun 26-da, son 16 tura isə iyunun 29-da start veriləcək.

1/4 finalın oyunları iyulun 5-6-da, yarımfinalın oyunları isə 9-10-da oynanılacaq. AVRO-2024-ün çempionu iyulun 14-də Berlin Olimpiya Stadionunda keçiriləcək final oyunu ilə müəyyənləşəcək.

AVRO-2024-də ümumilikdə 24 komanda 4-dən ibarət 6 qrupda mübarizə aparacaq. 6 qrupda ilk iki yeri və ən yaxşı 4 qrupda üçüncü yeri tutan komandalar son 16 tura yüksələcək.

Son 16 turdan başlayaraq turnir bir oyunluq sistemə keçəcək.

AVRO-2024-də iştirak edəcək komandalara paylanacaq pul mükafatının məbləği AVRO-2020 ilə eyni miqdarda, yəni ümumilikdə 331 milyon avro olacaq.

Turnirdə iştirak edən komandalar üçün pul mükafatlarının bölüşdürülməsi sistemi aşağıdakı kimidir:

İştirak haqqı: 9,25 milyon avro

Matç bonusu: qələbəyə görə 1 milyon avro, heç-heçəyə görə 500 min avro

1/8 finalda iştirak hüququ: 1,5 milyon avro

1/4 finala vəsiqə qazanmaq hüququ: 2,5 milyon avro

Yarımfinala yüksəlmək hüququ: 4 milyon avro

AVRO-2024 çempionuna 8 milyon avro əlavə ödəniş ediləcək. Çempion komanda qrupda keçirdiyi 3 oyunun hamısında qalib gəlsə, onun ala biləcəyi maksimum mükafat 28,25 milyon avro olacaq.

İkinci yerin sahibi 5 milyon avro əlavə ödəniş alacaq.