Yeni mövsümdə güclü heyət quraraq Super Liqada qalıcı olmağı hədəfləyən "Pendikspor" rəhbərliyi transfer işlərini sürətləndirib. İstanbul təmsilçisi İngiltərədən olan ulduz futbolçunu transfer etmək istəyir.
İqtisadiyyat.az "B'einsport"a istinadən xəbər verir ki, "Pendikspor" Teo Uolkottla maraqlanır. 34 yaşlı ulduz futbolçu Premyer Liqadan düşmüş "Sauthempton"la müqaviləsi başa çatdıqdan sonra azad agent statusu alıb.
16 mart 1989-cu ildə anadan olan Teo Uolkott karyerasına "Svindon" və "Sauthempton" akademiyalarında başlayıb. 2006-cı ildə 10,5 milyon avroya "Sauthempton"dan "Arsenal"a keçən Teo Uolkott ulduzunu burada parlatmışdı. 2018-ci ildə 22,5 milyon avro qarşılığında Evertona gedən Uolkott, icarə müddətindən sonra keçmiş komandası "Sauthempton"a geri dönüb. Ulduz futbolçu bu mövsümün sonunda aşağı liqaya düşmüş "Sauthempton"dan ayrılıb.
Bu mövsüm 25 rəsmi oyuna çıxan Teo Uolkott 5 dəfə rəqibin torlarını havalandıra bilib. 34 yaşlı sağ cinah yarımmüdafiəçisi 3 dəfə komanda yoldaşlarına qol ötürməsi verib. İngilis ulduz 1 matçda sarı vərəqə alıb.
