"Araz Supermarket" mağazalar şəbəkəsinin səkinin ortasında quraşdırılan reklam lövhəsi müzakirələrə səbəb olub.

İqtisadiyyat.az xəbər verir ki, mağazalar şəbəkəsinin Mingəçevir şəhərindəki filialının reklam lövhəsi Heydər Əliyev prospektindəki səkinin üzərində quraşdırılıb.

Bu isə səkinin üzərində piyadaların hərəkətini çətinləşdirib. Sakinlər deyir ki, xüsusən, valideynlər uşaq arabaları ilə hərəkət edərkən səkinin digər tərəfinə keçmək mümkünsüz olur.

Məsələ ilə bağlı "Araz Supermarket" mağazalar şəbəkəsinin Mingəçevir filialından İqtisadiyyat.az-a bildirilib ki, sözügedən lövhə uzun illərdir orada yerləşdirilib.

Qeyd edilib ki, əvvəllər ərazidə digər ictimai iaşə obyekti fəaliyyət göstərib və səkinin üzərində quraşdırılan lövhədə də həmin obyektin reklamı öz əksini tapıb. Sonradan həmin obyektin yerində "Araz Supermarket" mağazalar şəbəkəsinin Mingəçevir filialı fəaliyyətə başlayıb. Buna görə də qeyd olunan lövhədə mağazanın reklamı yerləşdirilib.

Filialdan həmçinin qeyd olunub ki, reklam lövhəsinin səkinin üzərində quraşdırılması ilə bağlı müvafiq qurumlarla razılaşma aparılıb. Razılaşmaya uyğun olaraq, lövhənin sökülməsi məsləhət bilinməyib.