“Mənim Hacı ilə şəxsi münasibətlərim yox idi. Amma onun mediadan fəaliyyətini izləyirdim. Çox mütərəqqi düşüncəli, yeniliklərə açıq, dünya görüşü müasir standartlara uyğun olan bir din xadimi kimi tanıyırdım onu”.

Bu sözləri İqtisadiyyat.az-ın sorğusuna cavab olaraq tanınmış şair Aqşin Yenisey dilə gətirib. Qələm adamı mərhum din xadimi ilə bağlı bir xatirəsini də bizimlə bölüşüb:

“Bir dəfə bir problemim olmuşdu. Maddi sıxıntım var idi. Elə bir məsələ idi ki, hər adamla da danışmaq olmurdu. Dostlarımızdan biri dedi ki, sənə bu məsələdə Hacı Şahin kömək edə bilər. Dedim “nə danışırsan, mən hər yerdə din tənqidçisi kimi tanınan bir adamam. O, mənim adımı heç yaxına buraxmaz”. Dostlar zəng vurdu, Hacı heç bir səbəb soruşmadan, təmənna güdmədən öz köməyini bizdən əsirgəmədi. Mən onda çox heyrətə gəlmişdim ki, bu adam necə bir ürək sahibidir. Bilə-bilə ki, mən onun yolunun, onun inancının tənqidçisiyəm, amma eşidən kimi ki, problemim var, bir azərbaycanlı din xadimi kimi əlindən gələn köməyi əsirgəmədi. O gündən sonra mənim demək olar ki, bir çox din adamlarına müsbət münasibətimin daha da möhkəmlənməsində rolu oldu.

Ona görə də mənim qəlbimdə Hacı Şahin əsl İslamın layiqli bir nümayəndəsi kimi tolerant və xoş görüşlü münasibəti ilə bir dost kimi yaşayacaq. Yəni mən düşünürəm ki, Azərbaycan cəmiyyəti özünün bir inanclı dostunu itirib. Həm ateisti, həm də dindarı bura aiddir. Bu gün səhər oxuyanda elə hesab elədim ki, bir dindar dostumu, mənə faydası toxunan bir dostumu itirdim. Yaxınlarına dərin kədər hissi ilə başsağlığı verirəm. Bu cəmiyyətə baxanda, bu müsəlman şərqinə baxanda ruhu bilmirəm bu dünyada şad idi, yoxsa bədbin idi, amma o dünyada ruhu şad olsun”.