"Apple" şirkətinin yeni "iPad mini 7"-nin gücünü qəsdən azaltması barədə məlumat yayılıb.
İqtisadiyyat.az xəbər verir ki, bu iddianı "PhoneArena" irəli sürüb.
15 oktyabrda ABŞ-nin texnologiya nəhəngi "Apple" şirkəti "iPad mini 7"-ni təqdim edib. Cihaz "iPhone 15 Pro" və "15 Pro Max" modellərində istifadə olunan A17 Pro prosessorunu alıb. Lakin mütəxəssislər bu çiplərin fərqli olduğunu aşkar ediblər.
Belə ki, A17 Pro 6 əsas nüvəyə, 16 nüvəli neyron prosessoruna və 6 nüvəli qrafik prosessoruna malikdir. Lakin "iPad mini" versiyasının daha aşağı performansa malik olduğu məlum olub. Bu cihazda qrafik prosessor yalnız 5 nüvəyə sahibdir.
"PhoneArena"nın mütəxəssisləri hesab edirlər ki, yeni planşetlər "binning" prosessorları ilə təchiz olunub, yəni istehsal zamanı qüsurlu çıxan və "iPhone" telefonlarında istifadə olunmayan çiplər "iPad mini" üçün saxlanılıb. "Apple" bu üsulla istehsal xərclərinə qənaət etmiş olub.
Bununla belə, A17 Pro çipi "iPad mini 7"yə süni intellekt vasitələri ilə işləməyə imkan verir. "iPhone 15 Pro" və "15 Pro Max" ilə yanaşı, "iPhone 16"nın bütün yeni modelləri də süni intellekt dəstəyinə malikdir.
