İqtisadiyyat.az xarici mediaya istinadla xəbər verir ki, yeniliklərdən ən diqqətçəkəni FaceTime zənglərində çılpaqlıq aşkarlanarsa görüntünün avtomatik dayandırılmasıdır.

Belə ki, iOS 26 ilə birlikdə FaceTime vasitəsilə edilən canlı görüntülü zənglərdə və ya video mesajlarda süni intellekt dəstəkli filtr çılpaq görüntü hiss etdikdə sistemi avtomatik aktivləşdirir. Ekranda “Bu məzmun həssas ola bilər” xəbərdarlığı çıxır və qarşı tərəfin görüntüsü bulanıqlaşdırılır. İstifadəçi bu xəbərdarlığı qəbul edərsə, zəngi davam etdirmək imkanı da təqdim olunur.

Apple bu funksiya ilə şəxsi həyatın qorunmasını və xüsusilə tanımadığı şəxslərlə aparılan görüntülü ünsiyyətin təhlükəsizliyini artırmağı hədəfləyir. Mühüm məqamlardan biri isə odur ki, çılpaqlıq analizləri Apple serverlərinə ötürülmür, bu proses tamamilə cihazın özündə – iPhone və ya iPad-in prosessorunda həyata keçirilir.

Hazırda iOS 26-ın test versiyası inkişaf etdiricilər üçün əlçatandır. Geniş istifadəçi bazası üçün isə public beta versiyasının yaxın günlərdə təqdim olunacağı gözlənilir. Əməliyyat sisteminin rəsmi versiyası sentyabr ayında uyğun iPhone modelləri üçün istifadəyə veriləcək.