"Son 3 il müddətində Azərbaycan bölgədə bir sıra tarixi uğurlara imza atdı".

Bu sözləri 24 saatlıq antiterror tədbirlərinin Azərbaycanın geosiyasi mövqeyinə təsirlərini dəyərləndirən Azərbaycan Bütövlük Platforması (ABP) sədri Bəhram İsmayıl İqtisadiyyat.az-a açıqlamasında deyib.

Onun sözlərinə görə, 1 günlük antiterror əməliyyatı Azərbaycana, ən nəhayət yuridiksiyasında olmayan ərazilərdə öz konstitusion quruluşunu tam bərpa etməyə imkan verəcək nəhəng hərbi uğurdur:

"2020-ci ilin noyabrından sonra Rusiyanın, Fransanın, İranın, Hindistanın Ermənistanı və himayəsindəki xunta qurumunu silahlandırmasına, Azərbaycana qarşı ayaqda tutması üçün 3 illik fəaliyyətinə dövlətimiz 24 saatla cavab verdi. Bu, Azərbaycan dövlətinin və ordusunun heç kimin təsəvvür belə etmədiyi gücündən xəbər verir. Son 30 ildə beynəlxalq hüquq, Qarabağla bağlı yaradılmış qurumlar, dünyanın aparıcı gücləri və dövlətləri Qarabağ problemini həll etməmişdondurmağa çalışırdılar. Lakin Azərbaycan dövləti bu məsələni Türkiyə başda olmaqla, bir sıra dost dövlətlərin də mənəvi dəstəyi ilə təkbaşına 44 gündə böyük ölçüdə həll etdi. ATƏT, BMT və bir sıra beynəlxalq qurumların qəbul etdiyi qətnamələr və sənədlər, məhz Azərbaycan tərəfindən icra edilib. 

Son 3 ildə Azərbaycan, Rusiya, Ermənistan tərəfindən imzalanan, beynəlxalq qurumlar tərəfindən təqdir görən bəyannəmanin ölkəmiz üçün əhəmiyyətli bəndləri yenidən dondurulmağa başlandı. Konkret olaraq bəyannamənin 4-cü bəndi, yəni erməni hərbi qruplaşmalarının tərksilah olunması və ərazilərimizdən çıxarılması məsul dövlətlər tərəfindən yerinə yetirmədi və əksinə bu qeyri-qanuni hərbi qruplaşmalar müəyyən güclər tərəfindən daha çox hərbi təchizatla təmin olunmağa başladı. Qarabağdan olan qaçqınların öz yurdlarına qayıtma məsələsi isə yalnız ermənilərin xeyrinə icra olundu".

Bəhram İsmayıl qeyd edib ki, Azərbaycan dövlətinin bütün sülhpərvər çağırışlarına baxmayaraq, Qarabağda yaşayan ermənilər və dəstəkçiləri hər vəchlə reinteqrasiya prosesindən qaçır və Axərbaycan dövlətinə tabe olmurdular. Hətta yenidən özlərinin qondarma idarəçilik qurumlarını yaratmağa cəhd edirdilər. Dövlət nümayəndələrimizlə görüşlərində isə qəbulolunmaz şərtlər irəli sürürdülər:

"Təbii ki, bu prosesin sonu olmalı idi və oldu. Azərbaycan dövləti 24 saat belə çəkməyən bir əməliyyatla erməni xuntasının, Ermənistan dövlətinin və imperialist maraqlarını həyata keçirmək istəyən beynəlxalq güclərin belini qırdı. Dünənədək ipə-sapa yatmayan seperatçılar ağ bayraq qaldıraraq təslim oldular və Azərbaycan dövlətinin bütün şərtlərini qəbul edərək, Yevlax şəhərinə tələblərimizi yerinə yetirmək üçün gəldilər. Qısacası, az qala əsrə bərabər olan bir gün bölgəmizdə mənafelərimizə zidd olan bütün maraqları alt-üst etdi və çox yaxın günlərdə Xankəndi başda olmaqla yerdə qalan, nəzarətimizdə olmayan ərazilərdə bayrağımızın dalğalanacağı şübhəsizdir".

ABP sədri vurğulayıb ki, digər bölgələrimizdə olduğu kimi Qarabağ iqtisadi zonasında Azərbaycan valyutası, vergi sistemi və bütün iqtisadi rıçaqlarımız işə düşəcək:

"Çox yaxın vaxtlarda Azərbaycan Daxili İşlər Nazirliyi Xankəndində, Xocavəndə, Xocalıda, Ağdərədə yaşayan, etnik mənsubiyyətindən asılı olmayaraq hər kəsi Azərbaycan pasportları ilə təmin edəcək və Azərbaycan qanunlarına tabe olmağı öyrədəcək. Qanunlarımızla yaşamaq istəməyənlər ərazilərimizi tərk edə bilərlər. Yaxın vaxtlarda Zəngəzur dəhlizinin açılması üçün tam iqtisadi blokadada olan, Türkiyə və Azərbaycandan asılı olan Ermənistan özü minnətçi düşəcək. Qarabağ iqtisadi zonasında konstitusion quruluşu bərpa etmək üçün keçirilən bir günlük antiterror tədbirlərinin rolu Azərbaycanın ərazi bütövlüyünə olan təhdidi ortadan qaldırıb, seperatizmə ölümcül zərbə vurub".

Gülşən Şərif