Azərbaycan Mərkəzi Bank (AMB) yarım milyondan artıq vergi borcu yaranan məşhur inşaat şirkətində nöqsanlar aşkarlayıb.

İqtisadiyyat.az xəbər verir ki, söhbət "TVM İnşaat" şirkətindən gedir.

Məlum olub ki, inşaat şirkəti valyuta tənzimi qaydalarının tələbini pozub. Buna görə də, AMB şirkət barəsində İnzibati Xətalar Məcəlləsinin (İXM) 430.4-cü maddəsinə əsasən cərimə protokolu tərtib edib.

Daha sonra protokol baxılması üçün Qaradağ Rayon Məhkəməsinə göndərilib və iş hakim Rufan Mürsəlovun icraatına verilib.

Şirkətin barəsində cərimə protokolu tərtib olunan maddədə deyilir ki, avans yolu ilə ödənilmiş valyuta vəsaitinin müqabilində müəyyən edilmiş müddətlərdə müvafiq mallar idxal edilmədikdə, işlər görülmədikdə və ya xidmətlər göstərilmədikdə ödənilmiş valyuta vəsaitinin xaricdən geri qaytarılmamasına görə vəzifəli şəxslər inzibati xətanın bilavasitə obyekti olmuş valyuta vəsaiti məbləğinin on faizindən iyirmi faizinədək məbləğdə, hüquqi şəxslər inzibati xətanın obyekti olmuş valyuta vəsaiti məbləğinin iyirmi faizindən otuz faizinədək məbləğdə cərimə edilir.

Xatırladaq ki, "TVM İnşaat" 2016-cı il tarixində dövlət qeydiyyatına alınıb. Nizamnamə kapitalı 10 manat olan şirkətin qanuni təmsilçisi Ağayev Musa Nizaməddin oğludur. Şirkətin hazırda dövlətə 619 363,14 manat vergi borcu da mövcuddur.