Dünyanın ən böyük e-ticarət platformalarından biri olan "Amazon" "TikTok" tərzində videoların yayımlandığı "Inspire" adlı bölmə yaratdığını bildirib.

İqtisadiyyat.az xəbər verir ki, şirkət alış-veriş axınını artırmaq üçün "Inspire"a video yükləyən kontent yaradıcılarına hər video üçün 25 dollar təklif edib.

"Techcrunch" xəbərlərində yer alan məlumata görə, "Amazon" müəyyən yaradıcılara e-poçt göndərərək eyni kateqoriyada iki və ya daha çox məhsuldan ibarət videolar yaratmağı təklif edib. Şirkət bu təşəbbüsü cəmi 35 000 video ilə məhdudlaşdırmağı və məzmun istehsalçılarına hər video üçün 25 dollar ödəməyi planlaşdırır. Ancaq yaradıcılar bu ödənişin az olduğunu bildirib.

Digər tərəfdən, "TikTok" da e-ticarət fəaliyyətini inkişaf etdirməyə başlayıb.

Demək mümkündür ki, "Amazon" və "TikTok" arasındakı rəqabət gələcəkdə daha da qızışacaq.