Alman şirkətlərinin iflas ərizələrinin sayı iyulda üçdə bir artaraq 1406-ya çatıb ki, bu da son 10 ilin ən yüksək göstəricisidir. 

İqtisadiyyat.az xəbər verir ki, bu barədə Leybniz İqtisadi Tədqiqatlar İnstitutu (IWH) məlumat yayıb.

İflasların sayında əhəmiyyətli artım bütün sektorlara təsir edib, lakin bu, xüsusilə sənayedə özünü göstərib. İyun ayında 100, iyulda isə 145 sənaye şirkəti müflis olmaq üçün müraciət edib. 

"Biz avqustda iflasların sayının bir qədər azalacağını, sentyabrda yenidən artacağını gözləyirik", - IWH eksperti Steffen Müller bildirib. Bu o deməkdir ki, iflaslar çox güman ki, koronavirusdan əvvəlki səviyyələrdən yuxarı qalmağa davam edəcək.

Almaniya ÜDM-i 2024-cü ilin ikinci rübündə qiymət, mövsüm və təqvim düzəlişləri nəzərə alınmaqla, 2024-cü ilin birinci rübü ilə müqayisədə 0,1% azalıb. Bundan əvvəl Almaniya Federal Bankının (Bundesbank) ekspertləri yazda iqtisadi artımın gözləniləndən xeyli zəif olduğunu bildirmişdilər. Beynəlxalq Valyuta Fondu (BVF) Almaniyanın bu il iqtisadi artım proqnozunu 0,3 faiz bəndi azaldaraq , 0,2%-ə endirmişdi. Almaniyanın ÜDM-i 2023-cü ildə əvvəlki illə müqayisədə 0,3% azalıb. Almaniya Federal Statistika İdarəsinin ekspertləri ötən ilin sonunda istehlak qiymətlərinin artması ilə əlaqədar əhalinin alıcılıq qabiliyyətinin aşağı düşdüyünü qeyd ediblər.