Almaniya iqtisadiyyatı 2019-cu ildə pandemiya dövründən bəri bərpa oluna bilməyib. Bu ilin üçüncü rübündə kiçilən Almaniya iqtisadiyyatının ixrac rəqəmləri isə azalmaqdadır.

Bu barədə İqtisadiyyat.az "TRT Haber"ə istinadən xəbər verir.

Mütəxəssislər bildirirlər ki, ilin sonuna kimi ölkə iqtisadiyyatında bərpa gözlənilmir. Məlumata görə, Almaniya iqtisadiyyatı yay aylarında tənəzzülə uğrayıb.

Ölkə iqtisadiyyatı bu ilin üçüncü rübündə ötən ilin müvafiq dövrü ilə müqayisədə 0,3% azalıb. Almaniya iqtisadiyyatının üçüncü rübdə kiçilməsinin əsas səbəbi yüksək inflyasiya və faiz dərəcələrinin şəxsi istehlakı yavaşlatması olub.

Sentyabr ayında Almaniyanın ixracı da kəskin şəkildə azalıb. Federal Statistika İdarəsinin açıqlamasına görə, ölkənin ixracı avqust ayı ilə müqayisədə 2,4% azalaraq 126,5 milyard avroya enib.

Qeyd edək ki, Beynəlxalq Valyuta Fondu (BVF) Almaniyanın bu il azalan yeganə inkişaf etmiş ölkə olacağını açıqlayıb.

 

Gözəl Həşimova