İqtisadiyyat.az xəbər verir ki, bu barədə Maks Plank Kimya İnstitutunun mütəxəssisləri araşdırma aparıb.

Məlumata görə, iqlim dəyişikliyi və havanın çirklənməsi 2100-cü ilə qədər təxminən 30 milyon insanın ölümünə səbəb ola bilər. Tədqiqat 2000-2090-cı illər arasında 10 illik fasilələrlə məlumatların təhlili yolu ilə həyata keçirilib.

Araşdırmalara görə ölümlər, xüsusilə Cənubi və Şərqi Asiyada cəmlənəcək. Bölgə əhalisinin qocalması və havanın çirklənməsi ilə bağlı davamlı problemlər bu pessimist proqnozun əsas səbəblərindəndir.

Qərbi Avropa, Şimali Amerika, Avstraliya və Asiya-Sakit okean hövzəsi kimi yüksək gəlirli regionlarda isə çox isti hava şəraitinə görə ölümlərin çox olacağı gözlənilir. Xüsusilə ABŞ, İngiltərə, Fransa, Yaponiya, Yeni Zelandiya kimi ölkələrdə bu tendensiya artıq özünü göstərməyə başlayıb.

Birləşmiş Millətlər Təşkilatının dərc etdiyi son hesabatda xəbərdarlıq edilir ki, əsrin sonuna qədər bütün dünyada temperatur 3,1 dərəcə arta bilər. Bu artım “fəlakət ssenarisi” hesab edilir.

Mütəxəssislər qeyd edirlər ki, lazımi ehtiyat tədbirləri görülməsə, dünyada təkcə səhiyyə sahəsində deyil, həm də iqtisadiyyat və sosial həyatda ciddi fəsadlar yarana bilər.

 

Gözəl Həşimova