Avropa İttifaqına (Aİ) üzv ölkələrin parlament başçıları Avropa İttifaqında 5 min nəfərdən ibarət birgə çevik reaksiya qüvvələrinin yaradılması ideyasını dəstəkləyiblər.
İqtisadiyyat.az xəbər verir ki, bu barədə Aİ parlamentləri rəhbərlərinin Balear adalarında keçirilən konfransının yekunları üzrə qəbul edilmiş sənəddə deyilir.
EFE agentliyinin verdiyi məlumata görə, palataların spikerləri İttifaqın kollektiv müdafiəsi üçün icmaya üzv dövlətlərin hərbi potensialına kifayət qədər sərmayə yatırılmasına zəmanət verilməsini zəruri hesab ediblər.
Aİ parlamentlərinin rəhbərləri həmçinin Aİ-nin öz vətəndaşlarının təhlükəsizliyini, maraqlarını və demokratik dəyərlərini müdafiə etmək üçün fəaliyyət göstərməyə imkan verən öz hərbi alətinə malik olmaq təşəbbüsünü xüsusilə aktual adlandırıblar.
Sənəddə qeyd olunur ki, bunun üçün müxtəlif tipli böhranlara cavab vermək üçün 5 minə qədər hərbçini yerləşdirmək lazımdır. Parlament rəhbərləri həmçinin xatırladıblar ki, Aİ artıq ölkələrdə və qonşu regionlarda vəziyyətin sabitləşdirilməsinə yönəlmiş bir çox missiya və əməliyyatlar hazırlayıb.
Vahid Avropa ordusunun yaradılması ideyası ən azı son on ildə səslənir. Bu, ABŞ prezidenti postunu Donald Trampın tutduğu dövrdə daha da aktuallaşıb və ölkəsinin artıq NATO çərçivəsində Avropanın müdafiə çətirini təmin etməyə hazır olmadığını açıq şəkildə bildirib. 2023-cü ilin noyabrında Xosep Borrell Aİ-nin 5000 nəfərlik çevik reaksiya qüvvələrini 2025-ci ilə qədər tam əməliyyat hazırlığına gətirəcəyini açıqlayıb.
