İqtisadiyyat.az xəbər verir ki, bu barədə Avropa Komissiyasının (AK) yaydığı bəyanatda bildirilir.

Sənəddə qeyd olunur ki, Aİ ABŞ məhsullarına qarşı cavab tədbirləri çərçivəsində rüsum tətbiq edilə biləcək sənaye və kənd təsərrüfatı məhsullarının siyahısı ilə bağlı ictimai məsləhətləşmələrə başlayıb.

“Əgər danışıqlar nəticəsində ABŞ-nin tətbiq etdiyi rüsumlar ləğv olunmasa, qarşı tədbirlər qüvvəyə minəcək”, – deyə Avropa Komissiyası bəyan edib.

Bundan əlavə, Aİ Ümumdünya Ticarət Təşkilatında (ÜTT) məsələ ilə bağlı mübahisə mexanizmini işə salmaq niyyətindədir. Bunun üçün təşkilata rəsmi məsləhətləşmələrin başlanması ilə bağlı müraciət göndəriləcək.

Xatırladaq ki, aprelin 2-də ABŞ Prezidenti Donald Tramp 185 ölkədən idxal olunan mallara yeni rüsum sistemi tətbiq edib. Yeni sistemə əsasən, bütün mallar üçün baza gömrük rüsumu 10% müəyyən edilib. Lakin bəzi ölkələr üçün bu faiz daha yüksəkdir – Çin üçün 34%, Vyetnam üçün 46%, Aİ üçün isə 20%. Dünyanın müxtəlif ölkələrinin liderləri Trampın bu qərarını tənqid edərək cavab tədbirləri görəcəklərini bəyan ediblər. Çin ABŞ-yə qarşı rüsumları artırmaqla cavab verib. Nəticədə ABŞ Çin məhsullarına tarifləri 145%-ə, Çin isə ABŞ məhsullarına tətbiq edilən tarifləri 125%-ə qədər yüksəldib.

Qeyd edək ki, daha əvvəl Aİ-nin ABŞ-ın “Boeing” təyyarələrinə qarşı da əlavə rüsum tətbiq edə biləcəyi bildirilib.