Azərbaycan Dövlət Su Ehtiyatları Agentliyinin tabeliyindəki Tikilməkdə Olan Obyektlərin Müdiriyyəti ərzaqlıq buğda istehsalı proqramı çərçivəsində mövcud əkin sahələrinin suvarma suyu ilə təminatına başlayır.
İqtisadiyyat.az xəbər verir ki, bu istiqamətdə həyata keçirilən tədbirlər çərçivəsində bir sıra rayonda suvarma sistemlərinin layihələndirilməsi və tikinti işləri aparılacaq.
Belə ki, Göyçay rayonu ərazisində dağətəyi ərazidə yerləşən və ’’Azorqanik” KTİİK- ya məxsus sahələrdə ərzaqlıq buğda istehsalı proqramına qoşulması üçün sahənin suvarma suyu ilə təminatı (Su mənbəyi Yuxarı Şirvan kanalı) icra olunacaq. Burada təsərrüfat daxili kanalın bərpası, Yuxarı Şirvan suvarma kanalının üzərində sərfi 0,7 kbm/san nasos stansiyasının tikintisi, D=630x10mm yeraltı təzyiqli boru və elektrik hava xəttinin çəkilişi, eləcə də 2500kva-lıq transformatorun alınıb quraşdırılması nəzərdə tutulub.
Həmçinin Şəmkir rayonunun Ceyrançöl massivində Kür çayı üzərində qurulmuş 2 pilləli nasos stansiyalarında qeyd olunan işlərin icrası nəticəsində Azərşəkər MMC-yə məxsus 2000 ha pivot suvarma sistemlərinin qurulması işləri aparılacaq.
Ağcabədi rayonu ərazisində “Maqro” MMC-yə məxsus 250 sahənin suvarma suyu ilə təmin olunması üçün istismar müddətini başa vurmuş 10 ədəd subartezian quyusunun təmir-bərpası həyata keçiriləcək.
Agentlik sözügedən işlərin icrasını "Ensol" Məhdud Məsuliyyətli Cəmiyyətinə həvalə edib və onujnla müqavilə bağlayıb. Müqaviləyə əsasən, işlərin icrası 6.129.833,32 manata başa gələcək.
Xatırladaq ki, ADSEA-nın layihələndirmə və tikinti işləri Prezident İlham Əliyevin 2022-ci ilin iyulun 19-da “Ərzaqlıq buğda ilə özünütəminetmə səviyyəsinin yüksəldilməsinə dair bir sıra tədbirlər haqqında” Fərmanın icrası ilə əlaqədar həyata keçirilir. Həmin fərmanla Azərbaycan Meliorasiya və Su Təsərrüfatı Açıq Səhmdar Cəmiyyətinə nəzərdə tutulan təsərrüfatların su təminatının təkmilləşdirilməsi məqsədilə tədbirlər görmək tapşırılıb.
Onu da qeyd edək ki, həmin fərmanla ilkin mərhələdə pilot layihə olaraq, Kənd Təsərrüfatı Nazirliyi ilə bağlanmış müqaviləyə əsasən müasir suvarma sistemlərinin tətbiq edildiyi təsərrüfatlarda ərzaqlıq buğda istehsalı ilə bağlı öhdəlik götürmüş şəxslər tərəfindən istehsal olunan və Dövlət Ehtiyatları Agentliyinə və un dəyirmanlarına təhvil verilən ərzaqlıq buğdaya 2023-cü ildən başlayaraq 5 il müddətində məhsul subsidiyası tətbiq edilib.
Fərmana əsasən, Kənd Təsərrüfatı Nazirliyi ilə bağlamış müqaviləyə əsasən müasir suvarma sistemlərinin tətbiq edildiyi təsərrüfatlarda istehsal olunmuş və Dövlət Ehtiyatları Agentliyinə və un dəyirmanlarına təhvil verilmiş ərzaqlıq buğdanın hər tonuna görə istehsalçılara 100 manat məhsul subsidiyası ödənilir.