"Adidas" yüksək rütbəli işçilərini "milyonlarla avronu mənimsəməkdə ittiham edən şikayət" aldıqdan sonra Çində böyük rüşvət iddiaları ilə bağlı araşdırmaya başlayıb.

İqtisadiyyat.az xəbər verir ki, bu barədə "Financial Times" məlumat yayıb. 

"Adidas Çin işçiləri" tərəfindən yazılmış anonim məktubda ölkənin marketinq büdcəsinə cavabdeh olan top menecer də daxil olmaqla bir neçə Adidas işçisinin qanunsuz əməllərdə adı çəkilir. Onların 250 milyon avronun mənimsədiyi bildirilir.

"Adidas" şirkəti iyunun 7-də Çində mümkün qanun pozuntularını xəbər verən anonim məktub aldığını təsdiqləyib. Alman idman geyimləri şirkəti məsələni kənar hüquq məsləhətçiləri ilə araşdırdıqlarını bildirib.

Alman idman geyimləri nəhənginin Çində satışları bu ilin birinci rübündə 8% artıb.