Vaşinqton administrasiyası Ukraynaya silah-sursat da daxil olmaqla 125 milyon dollarlıq yeni hərbi yardım paketi ayırıb.

İqtisadiyyat.az xəbər verir ki, bu barədə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi brifinqdə bildirib.

Qeyd edilib ki, ABŞ bu gün Ukraynaya yeni hərbi yardım paketini elan edib: "Bu, 125 milyon dollar məbləği əhatə edir".

Kirbinin sözlərinə görə, bu, ABŞ-nin 2021-ci ilin avqustundan bəri Ukraynaya köçürdüyü 63-cü hərbi yardım paketidir.

Pentaqonun bəyanatında Kiyevə HIMARS reaktiv yaylım atəş sistemləri, 155 mm və 105 mm-lik artilleriya mərmiləri, “Stinger” hava hücumundan müdafiə sistemləri, AT-4, TOW və Javelin tank əleyhinə raket sistemləri üçün döyüş sursatı veriləcəyinə aydınlıq gətirilir.

Bundan əlavə, paketə çoxfunksiyalı radiolokasiya stansiyaları, HMMWV zirehli texnikası, döyüş sursatı, ölkənin mühüm infrastrukturunun mühafizəsi üçün avadanlıq, eləcə də digər sistemlər və ehtiyat hissələri daxil olacaq.