ABŞ administrasiyası yaxın aylarda əməkdaşlığı artırmağa və Çinlə anlaşılmazlıqları aradan qaldırmağa ümid edir.
İqtisadiyyat.az xəbər verir ki, bunu ABŞ-nin maliyyə naziri Canet Yellen deyib.
"Qarşıdakı aylarda mən ümumi məqsədlərə doğru əməkdaşlığı gücləndirməyi və anlaşılmazlıqları aradan qaldırmağı səbirsizliklə gözləyirəm. Önümüzdəki həftələrdə və aylarda ABŞ-Çin münasibətlərində yarana biləcək problemlərə baxmayaraq, ABŞ prezidenti Co Bayden və mən qəti şəkildə bu plana sadiqik. Əlaqələri məsuliyyətlə idarə etmək, davam edən ünsiyyətimiz və əməkdaşlığımız xalqımız və dünyadakı insanlar üçün vacibdir", - deyə nazir ABŞ-Çin İqtisadi və Maliyyə Məsələləri üzrə İşçi Qrupunun üzvləri ilə görüşdən əvvəl bildirib.
Bundan əvvəl Çin Xarici İşlər Nazirliyinin Şimali Amerika və Okeaniya Departamentinin rəhbəri Yanq Taonun başçılıq etdiyi çinli diplomatlar Çin paytaxtında Amerika nümayəndə heyəti ilə məsləhətləşmələr zamanı ABŞ-dən Çinə ticarət sahəsində təzyiqləri dayandırmağı tələb ediblər.
