"Qəzza zolağında atəşkəsin əldə edilməsi barədə qərar Fələstinin HƏMAS hərəkatının Siyasi Bürosunun yeni rəhbəri seçilən Yəhya Sinvarın qərarından asılıdır".
İqtisadiyyat.az xəbər verir ki, bu qiymətləndirməni jurnalistlər üçün keçirdiyi növbəti brifinqdə Dövlət Departamentinin mətbuat xidmətinin rəhbəri Metyu Miller verib.
Onun sözlərinə görə, Sinvar HƏMAS-ın qərarlarına cavabdeh şəxs olaraq qalır: "HƏMAS Siyasi Bürosunun rəhbəri İsmail Haniyə ölməzdən əvvəl də belə idi və bu gün də vəziyyət eynidir".
Bundan əvvəl ABŞ dövlət katibi Entoni Blinken Qəzza zolağında atəşkəs sazişinin bağlanmasının mümkünlüyünün və bütövlükdə Yaxın Şərqdəki vəziyyətin Yəhya Sinvardan asılı olduğunu iddia etmişdi. Onun sözlərinə görə, Sinvarın HƏMAS siyasi bürosunun yeni rəhbəri seçilməsi təsdiq edir ki, atəşkəs və Qəzzada və bütövlükdə regionda sülh və təhlükəsizliyə nail olmaq barədə qərar ondan asılı qalır.
