ABŞ-nin Ukrayna, İsrail və Hind-Sakit Okean regionunda müttəfiqlərinə maliyyə yardımı göstərmək üçün ayrı-ayrı qanun layihələri çərşənbə günü ABŞ Konqresinin Nümayəndələr Palatasında təqdim olunacaq və şənbə günü səsvermə gözlənilir.
İqtisadiyyat.az xəbər verir ki, bu barədə Konqresin Aşağı Palatasının spikeri Mayk Consonun (Respublikaçı, Luiziana) qanunvericilərə ünvanladığı məktubda deyilir.
Məktubda qeyd edilib ki, kredit formatında strukturlaşdırıla bilən Ukraynaya, eləcə də İsrail və Tayvana yardım haqqında qanun layihələri yaxın vaxtlarda təqdim olunacaq. Daha bir qanun layihəsi, o cümlədən müsadirə edilmiş Rusiya aktivlərinin satışı, habelə Rusiya, Çin və İrana sanksiya tədbirləri çərşənbə günü açıqlanacaq.
"Biz bu qanun layihələri üzrə yekun səsvermənin şənbə günü axşam baş tutacağını gözləyirik", - Conson əlavə edib.
