ABŞ-nin Tennessi ştatında dövlət məktəblərindəki bəzi müəllim və işçilərə gizli şəkildə silah gəzdirməyə icazə verən qanun layihəsi qəbul edilib.
Bu barədə İqtisadiyyat.az xarici mediaya istinadən xəbər verir.
Respublikaçıların çoxluq təşkil etdiyi Tennessi Nümayəndələr Palatasında keçirilən səsvermədə qanun layihəsinin 68 deputat lehinə, 28-i isə əlehinə səs verib. Beləliklə, kritik qanun layihəsi təsdiqlənib.
Bu layihə qanuna çevrilərsə, dövlət məktəblərində çalışan bəzi müəllim və işçilərə gizli silah gəzdirməyə icazə veriləcək. Lakin heyətdə silah gəzdirilməsi üçün məktəb direktorunun və yerli hüquq-mühafizə orqanlarının yazılı icazəsi olmalıdır.
Qeyd edək ki, martın 27-də ABŞ-nin Tennessi ştatının Neşvill şəhərində “The Covenant” özəl xristian məktəbinə silahlı hücum olub. Təxminən 200 şagirdin təhsil aldığı məktəbə hücumda 3-ü uşaq olmaqla 6 nəfər həyatını itirib.
