Azərbaycanın ilk və tək komandası olan “MECHACK 9030” FIRST Robotics Competition (FRC) çərçivəsində keçiriləcək yarışlarda iştirak üçün ABŞ-yə yola düşüb.
İqtisadiyyat.az xəbər verir ki, bununla da ardıcıl üçüncü dəfə FRC-də iştirak edən Azərbaycan komandası həm də bu il məzun komanda olaraq çıxış edir.
Komanda ABŞ-ın Florida ştatının Orlando və Mayami şəhərlərində təşkil olunan yarışlarda ölkəmizi layiqincə təmsil edərək yeni nailiyyətlər qazanmağa iddialıdır.
Qeyd edək ki, “MECHACK 9030” komandası 2023-cü ildə New York City Regional yarışında “Rookie All-Star Award” mükafatını qazanaraq dünya çempionatına vəsiqə qazanıb, Houston Çempionatında isə “Rookie Inspiration Award – Newton Division” mükafatına layiq görülüb. Komandanın uğurları sırasında New York Regional yarışında “Wild Card” əldə etməsi də yer alır ki, bu da onların mühəndislik bacarıqlarını və komanda ruhunu beynəlxalq səviyyədə sübut etdiyini göstərir.
Bu müddət ərzində “MECHACK” komandası yalnız FRC çərçivəsində deyil, eyni zamanda altı FLL (First Lego League) və bir FTC komandası formalaşdıraraq STEAM sahəsində gənclərin inkişafına töhfə verib. Yaradılmış komandalar “Thinking Award” və “Attractive Team” “Enginnering Excellence Award” kimi dəyərli mükafatlara da sahib çıxıb.
“MECHACK” bu yolda ona dəstək olan sponsorlarına – Elm və Təhsil Nazirliyi, Rəqəmsal, İnkişaf və Nəqliyyat Nazirliyi, Azərbaycan Texniki Universiteti, Azercell, Kapital Bank, Azərbaycan Lotereyası, Azersun Holding, Azercosmos, Denetik Belgelendirme Şirkəti, B2B Group, Aura, ADMEDİA-ya dərin təşəkkürünü bildirir.
“MECHACK 9030” komandası yarışlarda ən yaxşı nəticələri göstərməyi və Azərbaycanı beynəlxalq arenada yüksək səviyyədə təmsil etməyi hədəfləyir.
