Balaxanı Sənaye Parkının rezidenti olan “Foriella” MMC gömrük qaydaları əleyhinə olan inzibati xətaya görə cərimələnib.
İqtisadiyyat.az-ın əldə etdiyi məlumata görə, Dövlət Gömrük Komitəsi tərəfindən şirkət barəsində İnzibati Xətalar Məcəlləsinin 485.2-ci (Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə) maddəsinə əsasən cərimə protokolu tərtib edilib.
Daha sonra protokol baxılması üçün Sumqayıt Şəhər Məhkəməsinə göndərilib. Məhkəmədə barəsində protokol tətbiq edilmiş MMC ilə bağlı müraciətə baxılıb.
Hakim Ramiz Quliyevin sədrliyi ilə keçirilən prosesdə qərar elan olunub. Qərara əsasən, şirkətə inzibati tənbeh tətbiq edilib, yəni cərimə kəsilib.
Xatırladaq ki, gömrük qaydaları əleyhinə olan inzibati xətaya görə vəzifəli şəxslər 1000 manat məbləğində, hüquqi şəxslər 1500 manat məbləğində cərimə edilir.
Qeyd edək ki, “Foriella” MMC Azərbaycanda masa, stul və oturmaq üçün digər mebellərin istehsalçısıdır. ABŞ, Gürcüstan və Qazaxıstana məhsul ixrac edən və süngər tullantılarının təkrar emalı və mebel istehsalı ilə məşğul olan “Foriella” MMC 2017-ci ilin sentyabr ayından fəaliyyət göstərir. Bu istehsal sahəsinin yaradılmasına 4 mln manat investisiya yatırılıb. “Foriella” MMC-nin rəhbəri Fərman İslamlıdır.
