İranın xarici işlər naziri Hüseyn Əmir Abdullahian ilə Britaniya Xarici İşlər Nazirliyinin rəhbəri Devid Kemeron arasında telefon danışığı olub. Abdullahian telefon danışığı zamanı bildirib ki, Tehran Yaxın Şərqdə gərginliyin artmasına müsbət yanaşmır.
İqtisadiyyat.az xəbər verir ki, bu barədə İran Xarici İşlər Nazirliyi məlumat yayıb.
"İran İslam Respublikası regionda gərginliyin artmasını istəmir, lakin İsrail rejimi təxribatlar törətmək istəsə, bizim növbəti cavabımız dərhal, daha sərt və genişmiqyaslı olacaq", - Abdullahian bildirib.
"Təəccüblüdür ki, son altı ayda Qəzza zolağının məzlum xalqının üzərinə bir neçə min ton bomba atıldığı halda, Böyük Britaniya İranın İsrail rejiminin İran diplomatik qurumlarına hücumuna reaksiyasından narahatdır", - İranın xarici işlər naziri əlavə edib.
O qeyd edib ki, Tehran BMT Nizamnaməsinin 51-ci maddəsində təsbit olunmuş qanuni özünümüdafiə hüququ çərçivəsində İsrailə qarşı cavab zərbəsi endirib.
Aprelin 14-də Kemeron bildirib ki, Abdullahian ilə söhbət zamanı İranın hərəkətlərini pisləyib və deyib ki, Tehran gərginliyin azalmasına nail olmalıdır. Aprelin 15-də BBC yayım korporasiyasının efirində Britaniya Xarici İşlər Nazirliyinin rəhbəri krallığın İslam Respublikasına qarşı sanksiyalarının sərtləşdirilməsini istisna etməyib.
