"A-Group Sığorta" şirkəti 2023-cü ili 698,9 min manat xalis mənfəətlə başa vurub.
İqtisadiyyat.az bu barədə şirkətin maliyyə hesabatına istinadən xəbər verir.
Tibbi sığorta üzrə ixtisaslaşan şirkət 2022-ci ildə 57,19 min manat xalis mənfəət açıqlamışdı.
Bununla belə, sığorta şirkəti ötən il əməliyyatlarını əvvəlki ilə nisbətən pis idarə edib. Belə ki, əsas əməliyyat gəlirləri 3,58 milyon azalaraq 22,05 milyona enib. 2022-ci ildə bu rəqəm 25,63 milyon manat təşkil edib.
Bu gəlirlərin 21,12 milyon manatı birbaşa sığorta üzrə sığorta haqlarının payına düşüb. Son bir ildə bu rəqəm 3,51 milyon manat azalıb.
Bu dövrdə ASC-nin əsas əməliyyat xərcləri 19,14 milyon manat, işlərin aparılması xərcləri 5,23 milyon manat, sair xərcləri 41,1 min manat, cəmi xərcləri 24,4 milyon manat təşkil edib.
Sığorta şirkətinin cəmi aktivləri son bir ildə 2,1 milyon manat əriyib. Belə ki, 2024-cü il yanvarın 1-nə "A-Qroup Sığorta"nın cəmi aktivləri 27,13 milyon manat təşkil edib ki, bu da əvvəlki ilə nisbətən 7,1% azdır. Bu dövrdə şirkətin cəmi öhdəlikləri 2,71 milyon manat və ya 15,3% azalaraq 15,02 milyon manata enib. Balans kapitalı isə 6,1% artaraq 12,1 milyon manat təşkil edib.
Xatırladaq ki, "A-Qroup Sığorta" 1995-ci ildə yaradılıb. Onun nizamnamə kapitalı 10 005 250 manatdır. Qanuni təmsilçisi isə Atakişiyev Məmməd Natiq oğludur.
