Ötən il qızıl ehtiyatlarına görə lider olan ölkələrin ilk onluğu müəyyənləşib.
İqtisadiyyat.az-ın araşdırmasına görə, indiyə qədər dünyada cəmi 244 min ton qızıl hasil edilib və bunun üçdə ikisi 1950-ci ildən hasil edilib.
Qızıl planetdəki ən dəyərli metallardan biridir. Minilliklər boyu o, zərgərlik, incəsənət və valyutada istifadə olunub.
Dünya üzrə ümumi qızıl ehtiyatları 2010-cu ildən 2023-cü ilə qədər olan dövr ərzində nisbətən sabit qalıb.
Araşdırmalara görə, 2023-cü ildə qlobal qızıl ehtiyatları 59 min ton təşkil edib ki, bu da nəzərdən keçirilən dövrdə qeydə alınmış ən yüksək qızıl ehtiyatı olub.
2024-cü ildə dünyada ən çox qızıl ehtiyatına malik ölkə ABŞ olub ki, o da siyahıya 628 milyard dollar dəyərində 8133 ton qızılla liderlik edib. Almaniya 3351 tonla ikinci, İtaliya isə 2452 tonla üçüncü yerdədir.
Dünyada qızılın böyük hissəsi təhlükəsizlik, likvidlik və gəlirlilik xüsusiyyətlərinə görə bu ehtiyatları saxlayan mərkəzi bankların əlindədir. Bu qurumlar tarix boyu hasil edilən bütün qızılın təxminən beşdə birini əldə ediblər.2024-cü ilin birinci yarısında mərkəzi banklar 483 ton qızıl alıb və yeni rekorda imza atıblar.
Türkiyə ötən ilin ilk yarısında cəmi 45 ton qızıl əldə edərək ən çox qızıl alıcısı olub. Hindistan ilk altı ayda cəmi 37 ton qızıl alaraq ikinci yeri tutub. Ənənəvi olaraq aparıcı alıcı olan Çin bu yaxınlarda qızıl alışlarını yavaşladıb. Bundan əvvəl Çin mərkəzi bankı ardıcıl 18 ay qızıl ehtiyatlarını artırıb.
2024-cü ildə qızıl ehtiyatlarına görə lider ölkələr bunlardır:
Ölkə |
Ton |
Amerika Birləşmiş Ştatları |
8,133 |
Almaniya |
3,351 |
İtaliya |
2,452 |
Fransa |
2,437 |
Rusiya |
2,336 |
Çin |
2,264 |
İsveçrə |
1040 |
Yaponiya |
846 |
Hindistan |
831 |
Niderland |
612 |
Gözəl Həşimova