İqtisadiyyat.az bu barədə "Anadolu Agentliyi"nə istinadən xəbər verir.

Məlumata görə, “Azərbaycan Hava Yolları”nın təyyarəsi Qazaxıstanda qəzaya uğradıqdan sonra dünyada sərnişin təyyarəsi qəzaları hadisələri gündəmə gəlib.

Bu il baş verən sərnişin təyyarəsi qəzaları:

Brazilya

Araşdırmalara görə, bu il ən çox ölümlə nəticələnən sərnişin təyyarəsi qəzalarından biri Braziliyada baş verib. Belə ki, avqustun 9-da Braziliyanın Kaskavel şəhərindən Quarulhosa uçan ATR-72 sərnişin təyyarəsi yaşayış məntəqəsinə çırpılıb.

Qəza nəticəsində 58 sərnişin və 4 ekipaj üzvü olmaqla 62 nəfər həlak olub. Təyyarə yerə çırpıldıqdan sonra alovlandığı üçün şəxsiyyətin müəyyən edilməsi prosesi çətin olub. 10 sərnişin isə qəzadan sağ çıxıb.

Yaponiya

Yaponiyada yanvarın 2-də sərnişin təyyarəsi Tokio hava limanında eniş edərkən sahil mühafizə təyyarəsi ilə toqquşaraq yanıb.

Sərnişin təyyarəsindəki 379 sərnişin və ekipaj üzvləri təhlükəsiz şəkildə təxliyə edilərkən, sahil mühafizə təyyarəsində olan 6 nəfərdən 5-i həyatını itirib, pilot isə yaralanıb.

ABŞ

ABŞ-də Alyaska Hava Yollarına məxsus "Boeing 737 MAX 9" tipli sərnişin təyyarəsi havada olarkən gövdəsinin bir parçasının qopması səbəbindən yanvarın 5-i axşam saatlarında məcburi eniş edib.

Oreqondan Kaliforniyaya uçan təyyarə havaya qalxdıqdan təxminən 35 dəqiqə sonra təcili eniş etməli olub və gövdə parçasının qopduğu hissədə sərnişinlərin olmadığı bildirilib.

Təyyarədə olan 171 sərnişin və 6 ekipaj üzvü təhlükəsiz şəkildə çıxarılıb.

Nepal

İyulun 24-də Nepalda havaya qalxarkən uçuş-enmə zolağına düşən təyyarədə 18 nəfər həlak olub.

Paytaxtdakı Tribhuvan beynəlxalq hava limanında içərisində 19 nəfərin olduğu təyyarə havaya qalxarkən sürüşərək qəzaya uğrayıb.

Təyyarədə olan 18 nəfərin cəsədi çıxarılıb, pilot yaralı halda xilas edilib.

Rusiya

Rusiya Müdafiə Nazirliyi yanvarın 24-də Belqorod vilayətində içərisində ukraynalı məhbusların olduğu Rusiya təyyarəsinin Ukrayna tərəfindən atılan raketlə vurulduğunu açıqlayıb.

Göyərtəsində 6 nəfərlik ekipaj, münaqişədə əsir düşən 65 Ukrayna əsgəri və onları müşayiət edən 3 Rusiya hərbçisi olan təyyarədə sağ qalan olmayıb.

Bundan əlavə, martın 12-də Rusiyanın İvanova vilayətində içərisində 15 nəfərin olduğu İL-76 tipli hərbi təyyarə qəzaya uğrayıb.

Rusiya Müdafiə Nazirliyi İL-76 tipli hərbi-nəqliyyat təyyarəsinin mühərrikinin alışması səbəbindən qəzaya uğradığını bildirib.

Qəza nəticəsində təyyarədə olan 8 nəfərlik heyət və 7 sərnişin həlak olub.

 

Gözəl Həşimova