Logo

Palata: Azərbaycanda yeni sığorta növləri və mexanizmlər formalaşdırılacaq


Azərbaycan Respublikasının Nazirlər Kabinetinin 21 may 2019-cu il tarixli Sərəncamı ilə təsdiq edilmiş “Sığorta sektorunun inkişaf etdirilməsi üçün görülməli işlərlə bağlı Tədbirlər Planı”nın icrası nəticəsində ölkənin sığorta sektorunda yeni mexanizmlərin tətbiqi ilə yanaşı, yeni sığorta növlərinin də yaradılması nəzərdə tutulub. 

Bu barədə "Report"a açıqlamasında Maliyyə Bazalarına Nəzarət Palatasının (Palata) Sığorta Fəaliyyətinə nəzarət departamentinin Qeyri-həyat sığorta infrastrukturuna nəzarət idarəsinin rəisi Firdovsi Ağaşirinov bildirib.

"Belə ki, həkimlərin peşə məsuliyyətinin icbari sığortası növünün, Sığorta agentlərinin peşə məsuliyyətinin sığortası növünün, Tikinti-inşaat zamanı tikinti aparan şəxslərin mülki məsuliyyətinin icbari sığortası növünün və saxlanc yerlərinin sahiblərinin mülki məsuliyyətinin icbari sığortası növünün formalaşdırılması nəzərdə tutulub", - F.Ağaşirinov qeyd edib.

Onun sözlərinə görə, sığorta sektorunun inkişaf etdirilməsi ilə bağlı sığorta sektorunda yeni mexanizmlər də tətbiq olunacaqdır: "Bu yeni mexanizmlərə misal olaraq kənd təsərrüfatı sığortası mexanizmini, müştərək sığorta mexanizmini, mikro sığorta mexanizmini, sığortalıların elektron mərkəzi məlumat sistemini, könüllü sığorta növləri üzrə qarantiya mexanizmini və s. qeyd etmək olar".

Qeyd edək ki, bu ilin yanvar-iyun aylarında Azərbaycandakı 22 sığorta şirkətinin xətti ilə 361,337 milyon manat məbləğində sığorta haqqı toplanılıb. Bu, ötən ilin eyni dövrü ilə müqayisədə 8,8% azdır.

Altı ay ərzində sığorta şirkətlərinin həyata keçirdikləri ödənişlərin məbləği isə 119,102 milyon manat təşkil edib. Bu isə illik müqayisədə 0,2% azdır.

2019-cu ilin yanvar-iyun aylarında sığorta bazarında toplanmış hər 100 manat sığorta haqqının 33 manatı ödəniş edilib. 2018-ci ilin müvafiq dövründə bu göstərici 30,1 manat olub.

Sığorta,
25.07.2019 15:51 102
Teqlər: İqtisadiyyat, sığorta, maliyyə, bazar, nəzarət, palata, həyat, qeyri, departament, rəis, idarə, açıqlama,